Association de Généalogie et d'Archives Wervicquoises
A défaut de connaître son avenir, découvrons notre passé
EUL’ FROMUCHE ET L’CIGALE
EUL’ FROMUCHE ET L’CIGALE.
Actualisé en picard par Gérard Zègres.
L'ate jour, in sortant d'amou Morel, après ène réunian d'afaires, ène fromuche tchéôt néz à néz avèc ène cigale qui s'in alôt, friyon batan, ène guitare d'zous sin bras, cantér au cabarét du Cat.
Pour avôr in beutche d'ouvrache, l'frômuche, pindant cheule réunian, avôt dû promète puque d'bure que d'pan ét èle alôt d'vôr wéti prés pour arivér à loyi lés deûs d'bouts. Cha fét qu'in véyant cheule cigale avèc euss'n-air fin bénache, éle ést v’nue in rache.
- Ti, j'te vôs v'nir, qu'èle li a dit, asteur qu'i fét ban, te fés l'amusète et te cantes més à lés courts-jours, te vas bourlér court et pour eut' récaufér, te vas v'nir à m'majan après dés gayètes… Més t'aras t'n-air ! Te pouras buqui ét faire! Mi, eum' luche, j'vas pôs l'ouvèr.
- Nan més! Quô qui t'prind ? qu'èle a répondu l'cigale, j'n'é pôs b'son d'tés gayètes. Mi, j'sus modèrne, je m'caufe au gaz naturèl et pour péyi lés traites, j'é pôs d'misère: més canchons i s'vint'te comme dés p'tits pans. In puque, à lés courts-jours, j'sus à Paris! In m'a d'mandé d'aleû cantér més canchons à l'télévisian. Lassan, pindant qu'ti, te vas troner d'frôd au tchun de t'n-étufe pour aparéni tés gayètes; mi, j’vas suér d’caud d’zous lés leûmires ét ramassér la galète. Pasques si qu’te buzis que j’fés tout cha pour rin ! Eh bé ! Ch’ést bin pus simpe ! Mi, j’gane puk de doupes su in jour avèc més canchons, que ti, t'in ramasses su in an avèc tés mans!
Eul’ fromuche, èle in jôkôt tout paf… Et ch ést lassan qu’èle a d'mandé à l'cigale:
-Te voudrôs pôs faire ène saquô pour mi ?
-Si fét ! Et quô que j'peûs faire pour ti ? qu'èle a répondu l'cigale, bonne file.
-Bin v'là! Si alfôs, à lés courts-jours à Paris, te vérôs Monsu d'La Fontaine, te voudrôs pôs li dire qu'i frôt gramint mi d' canji sés fabes ? Pasque mi, d'tous sés z-histôres, j'in sus malate ! ..
Moralité: I-a rin d'pus triste que v'nir au monte dins ène maronne d'ouvri !
