Association de Généalogie et d'Archives Wervicquoises
A défaut de connaître son avenir, découvrons notre passé
L’PIYOUTCHE D'BOCAL
L’PIYOUTCHE D'BOCAL
Ene garlousète in picard coménôs par Gérard Zègres
Tous les lindis matan, qu'i drache ou qu'i fache bé, Titine print sin vélo pour aleû faire in tour. Cheule grante brouyie, qui-a séki su I'branke et qui rèste à Capéle, èle a tèlemint lés clopes de roulér dins I'centre d'Cômanes, qu'ène fôs arivée al' barire du kmin d'fér, èle saute toudi ju d’sin vélô. Et adan, comme ène rue-tout-ju, èle continue sin kmin à pid in tnant sin vélô à s'man.
Comme i-a jomés rin à sin goût au marché d'Belgique, èle a vite fét d’cachi après perdu, ét sans tèrlonji pus lormint le vlà in vô au marché d'Cômanes-France. Là, i-a toudi gramint puk de jins ét pour euss, ch'ést pôs régalant, cheule fème qui trandèle avèc sin vélo à s'man. Més tin, cha fét déjà si lormint qu'èle vint piténér lassan tous lés lindis au marché, qu'ch'ést pus asteur qu'èle va canji, éh non! Après avoir wéti tout rond ét surtout bin imbèrné lés jins avèc sin sacré vélô, avant d'eurpérir à Capéle, èle rinte au cabarét du Sapeur. Titine, ch'ést nin ène buvôre més si èle rinte là, ch'ést nin pour bôre d'l'éwe d'orlavache américaine, te peûs bin buziyi. Ch'ést nin èle qui buvrôt d'cheule pichate d’baudét, nin non. Titine, quand qu'èle bôt in verre, ch’ést toudi ène saquô d'bon. Adan, tous les lindis, cha n'fét pôs in pli, èle rinte au Sapeur pour bôre sin verre de chuche mourète, l’apéritif dés jins du Nord…
...l-a d'cha quate ou chonq môs (i peût manme avôr in beutche puk, eul' temps i passe si vite), avant sin marché d’France, èle étôt rintrée amou Bourjô pour acatér in saclé d’grènes de tchiou. Faut dire que tous l’z-ans, après lés courts-jours, èle print ène bonne purche. Et in sortant du potard, èle avôt vu dvant l’cabarét du Centre, ène réclame pour in voyache d’trôs jours à Paris. Comme Irma, l’bateusse de cartes li avôt prédit du canjmint après in p’tit voyache, sans buziyi pus lon, èle a muchi dins l’cabarét pour s’faire marqui su l’liste. Titine qui n’avôt akeur jomés mis i, pid pus lon que l’bôs du Gheer d’pus que s’boudène èla avôt tcheû (i-a d’cha béteû quarante ans), èle étôt tout in foufèle. Et cheule fôs là, avant d’eurpérir à s’majån, èle avôt acaté ène valise amou Cuirlux, ét ène béle sète ! Tout in tchur ét avec dés roules in d’zous.
Ele étôt tèlmint bénache in rintrant que du sôr déjà, s’valise èle étôt fin prète. Et quionze jours pus tard, timpe au matan, éle étôt l’preumire su l’plache Sainte-Anne pour atinte après l’autobus Derudder.
Et pour ène fôs, Irma, l’bateusse de cartes, èle avôt vu juste. Pour du canjmint, i-avôt u du canjmint pour Titine après sin voyache. In peut manme dire in sacré canjmint. Vlà qu’èle aparène ! Ele aparène més nin comme lés fèmes i-ont aparéni jusqu’asteur, man ! Nin non, nin non, Titine èle aparène dins ène éprouvette !!
Acoute ! Quand qu’èle avôt éteû à Paris, èle étôt dins l’autobus à côté d’deûs fèmes qui-avôt’te gramint estrivé su l’enseminache artificièl. Chés quatèr-lanques i-avôt’te l’air d’ète à la pache su cheule rare d’affaire. I-ont gramint dépati su l’qualité dés sminches qu’lés infirmières i métôt’te dins lés congélateurs. Més i-ont jomés rin dit su l’manire de printe lés sminches. ( A m’mote que si in pouvôt wéti par eul’ tra de l’sérure pour vir l’infirmière à l’ouvrache, in arôt alfôs gramint d’pléji, man !)Més qui swate ! Tout chin qu'Titine èle avôt ortenu du racontache, ch'ést qu'ène fème qui veût acatér, in infant au jour d'aujordu, èle n'a pus bson d'avôr à faire avec in ome... Ele a fok a l’demandér à sin docteur qui va li moutrer in cataloque. Ch’ést presque comme in cataloque Gontier avèc dés sminches pour eul’ gardin. Més al’ plache d’avôr ène photo d’porés ou bin ramolas, ch’ést l’photo dés ceuss qui-ont donné lés sminches. Ele peût cujir sti qu’èle veût ét manme si lés sminches, i dôt’te v’nir d’Amérique ou bin du Japon, in trôs jours, l’cômande èle ést là. Et cha va autermint pus vite qu’ène lète qui dot vnir d’ Comanes-France par la poste. Dins l’temps, sans faire dés meûnoules, lés facteurs i feûjôt'te l'échanche dés lètes su l’grand pont. Més asteur qu’i-a pus d’frontire, tout dôt passér par Paris ét Mons. Ch’ ést cha I Europe unie!! Eh bé!!
Tout 'sut après sin, voyache à Paris, Titine n'avôt pôs tèrlonji l’orrmint avant d’ aleû vir sin docteur. Et. chétôt bin comme i-avôt.’te dit dins l’autobus. .Ele a pu cujir sti qu'èle aimôt bin et in trôs jours, les sminches i-étôt’te là. Et su l’biyard, in chonq minutes, eul’ tour i-étôt jeûwé. Nom de djou ! qu èle étôt bénache in sortant d’ l'hôpital. Ele qui dit toudi, comme s’matante Sidonie, qu’èle veut nin d’in ome a s'majån, èle a tout d'manme cuji in garchan. Et pour èle nin avôr les hics ét lés hiacs qu’ont lés fèmes qui-aparènt'te, èle a tout bèlmint cuji l’éprouvete, eul’ tout nouvéle mote d aparènache.
I faut crôre qu'èle alonjôt vrémint, pasque pour sin ptit nom à l’infant, èle a cuji Dsiré. Més comme tout i-a été fét par ordinateur, eul’ nom d’sin père, cha sra fok in limérô. Ah bin tin ! In beutche alfôs, à cha osseû, in va dvôr s’y faire. Au jour d’aujordu, neuf fôs sur diche, quand qu’in dmande à in marale l’nom de s’mopère, i répond ; « Eulquel ? Sti de l’semane ou bin sti du démanche ? Adan, tout bin buziyi, in limérô, ch’ést tout osseû bin, ch’ést pôs comme cha, més jins ?
Més pour ène afaire, cha ch't-ène afaire, ét tous lés smanes, Titine èle va vir sin ptit Dsiré dins l’éprouvète là-va à l’hôpital. Ch'tin beutche comme in gardéneû qui va vir poussér sés pôs d’chuc dins sin gardin, quô ! Et dins sin quarti à Titine, tèrtouss i n-d-in parl’te. Eul pus comique, comme toudi, ch’ést l’z-infants. L’ate jour, j’intindôs ène béle peûtite vèrdire qui dijôt :
- Mô, j’sus pôs vnue au monde dins in bocal. Mô, j’sus vnue au monde dins ène rose blanke.
- Eh bin mô, qu’i-a répliqui in côlô, si j’é dés brins d’Judas à m’guife, ch’ést pasque j’sus vnu au monde dins in chou rouche. Ch’ést m’manman qu’èle l’a dit, na. Ele a manme dit qu’si min mononke Tuture, ch’ést in bas-tchu, chést pasque li, i-ést vnu au monde dins ène choumète.
- Et bin mô, qu’i-a dit in infant d’file, j’sus vnu au monde dins in oeuf, na !
- Dins in oeuf, qu’i-ont dmandé tous insonne, ét ch’ést osseû t’manman qu’èle l’a dit ?
- Eh bin non, justemint, ch’ést pôs manman. Més je l’sés, tralala. Je l’sés pasque chaque fôs que j’va acatér dés chucrates à Cômanes, i-a l’bouticli qui dit : Tins, vlà l’piyoutche à l’glène de Capèle.
Adan, j’é buziyi : Eh bin ch’ést cha ! Quand qu’Titine èle va vnir faire sin tour à Cômanes avèc sin ptit Dsiré assis dins l’kadô drire sin vélô, i-a dés machés lanques qui vont dire : « Tins ! Vlà Titine avèc sin piyoutche d'bocal !".
